Nënkryetari i Komunës së Skenderajt, Fadil Nura, pas takimit të rregullt dhe të përvitshëm me Këshillin Shtetëror për shënimin e Epopesë së UÇK-së, deklaroi se përgatitjet për organizimin e aktiviteteve të 5, 6 dhe 7 marsit po zhvillohen sipas planit të paraparë.
Në këtë takim, Nura vuri në dukje mungesën e përfaqësuesve të organizatave të dalura nga lufta. Ai e adresoi çështjen drejtpërdrejt, ndërsa kryesuesi i këshillit shpjegoi se shoqatat janë ftuar përmes adresave të email-it dhe se posedojnë të dhënat e tyre. Sipas kryesuesit, do të mbahet një takim i veçantë midis kryesuesit, bashkëkryesuesit dhe këtyre shoqatave.
"Po takimi shkoi mirë, si gjithmonë, i përvitshëm që kemi mbajtur. Përjashtimisht, mungesën e vërejta të organizatave të dalura nga lufta, me këtë rast unë si anëtar i këtij këshilli e adresova këtë çështje, dhe mora përgjigje nga kryesuesi se shoqatat janë pjesë e vendimit të Këshillit dhe të njëjtën kohë janë ftuar përmes email adresës, me ç’rast ne i posedojmë edhe email adresat, por mbet’ kryesuesi me bashkë-kryesuesin e këtij këshilli që të kenë takim të përbashkët me shoqatat e dalura nga lufta", u shpreh Nura.
Sa i përket agjendës, programi është i strukturuar kryesisht rreth ceremonive qendrore, ndërsa detajet e tjera do të diskutohen në takimet e ardhshme. Aktivitetet kryesore përfshijnë:
- parakalimin e FSK-së;
- homazhet;
- ceremoninë qendrore;
- organizimet në Skenderaj me Natën e Zjarreve dhe ngjarje artistike;
- vazhdimin e praktikës që nxënësit në të gjitha shkollat e vendit t’i kushtojnë orën e parë Epopesë së UÇK-së.
Kjo praktikë synon t’u përcjellë brezave të rinj të vërtetën për këtë ngjarje historike.
Përditësime
Fadil Nura shpjegoi planin kryesor për Epopën e Ushtrisë Çlirimtare të Kosovës. «Plani kryesor është organizimi i Epopës për 5, 6 dhe 7 mars. Është një agjendë ku pjesa kryesore tashmë dihet, përfshirë strukturën kryesore, ndërsa aktivitetet e tjera do të diskutohen më detalisht në takimet e ardhshme», deklaroi ai.
Ministri i Mbrojtjes, Ejup Maqedonci, kryeson mbledhjen e parë të Këshillit Shtetëror për Epopenë UÇK, për 28-vjetorin e UÇK-së.
OVL UÇK reagoi se nuk u përfshi fillimisht dhe ftesa erdhi si urdhëresë. Fatmir Sopi kërkoi kontakte direkte me Qeverinë.