Publikohet agjenda e aktiviteteve për Epopejën e UÇK-së më 5-7 mars

Ministria e Mbrojtjes e Republikës së Kosovës ka publikuar agjendën zyrtare të aktiviteteve për shënimin e Epopejës së Ushtrisë Çlirimtare të Kosovës (UÇK), që do të zhvillohen më 5, 6 dhe 7 mars në disa qytete të vendit.

Aktivitetet përfshijnë mbledhje solemne, homazhe, ekspozita, aktivitete sportive dhe programe artistike. Në njoftimin zyrtar thuhet se ministria fton qytetarët të marrin pjesë në këto aktivitete përkujtimore dhe festive, për të nderuar sakrificën e dëshmorëve dhe për të festuar me dinjitet vlerat e lirisë.

Agjenda e 5 marsit

Aktivitetet nisin në orën 08:00 me orën e parë mësimore në të gjitha shkollat e Kosovës, kushtuar Epopejës së UÇK-së. Në orën 09:00 mbahet mbledhja solemne e Qeverisë së Republikës së Kosovës, ndërsa në orën 10:00 zhvillohen seanca solemne në kuvendet komunale.

Në orën 12:00 parashihet rreshtimi i kuadrateve të Forcës së Sigurisë së Kosovës (FSK) në Kazermën “Adem Jashari” në Prishtinë. Në orën 14:30, në Skenderaj mbahet gara mbarëkombëtare e volejbollit për femra “Adem Jashari”.

Agjenda e 6 marsit

Në orën 10:00 krerët e shtetit bëjnë homazhe në Kompleksin Memorial “Adem Jashari” në Prekaz. Nga ora 10:00 deri në 12:00, përfaqësuesit komunalë bëjnë homazhe në komplekset memoriale të dëshmorëve.

Në orën 13:00 hapet ekspozita “Tri ditë që ndryshuan historinë”, e organizuar nga Kuvendi i Republikës së Kosovës. Në orën 19:00 mbahet Akademi përkujtimore për Epopejën e UÇK-së me pjesëmarrje artistike nga Opera dhe Filarmonia e Kosovës në Pallatin e Rinisë (Salla e Kuqe), ndërsa në orën 21:00 parashihet mbyllja e ceremonisë.

Agjenda e 7 marsit

Epopeja përmbyllet me “Natën e Zjarreve” në Prekaz, duke filluar nga ora 18:00.