Hulumtimet shkencore kanë treguar se përzgjedhja e objektivave nga mushkonjat bazohet në një kombinim kompleks të faktorëve biologjikë dhe kimikë që ndryshojnë nga një individ te tjetri. Mushkonjat femra, të cilat kanë nevojë për gjak për procesin e riprodhimit, orientohen fillimisht nga dioksidi i karbonit që njerëzit nxjerrin gjatë frymëmarrjes.
Kur insektet i afrohen viktimës, ato nisin të dallojnë aromat specifike të trupit, të ndikuara nga mikrobioma e lëkurës. Kjo e fundit prodhon qindra përbërje kimike, mes të cilave studiuesit kanë veçuar substancën 1-okten-3-ol, e njohur ndryshe si "alkooli i kërpudhave". Personat që prodhojnë sasi më të mëdha të kësaj substance, përmes zbërthimit të sebumit të lëkurës, rezultojnë më tërheqës për mushkonjat.
Ekspertët theksojnë gjithashtu se faktorë të jashtëm, siç është konsumimi i alkoolit, ndikojnë në rritjen e rrezikut për t'u pickuar. Sipas një studimi të zhvilluar në Holandë me 465 pjesëmarrës, personat që kishin konsumuar birrë brenda 24 orëve të fundit ishin 35 për qind më tërheqës krahasuar me ata që nuk kishin konsumuar alkool. Konsumimi i birrës ndikon në rritjen e temperaturës trupore, shtimin e sasisë së dioksidit të karbonit dhe modifikimin e aromës së lëkurës.
Në të kundërt, shkenca hedh poshtë disa besime popullore. Aktualisht nuk ka prova që mushkonjat të preferojnë lloje të caktuara gjaku, apo që tipare si ngjyra e flokëve, e syve ose e lëkurës të ndikojnë në orientimin e tyre drejt një personi të caktuar.