Ekspertët shëndetësorë theksojnë se alkooli ndikon në mënyrën se si trupi përthith dhe metabolizon medikamentet, duke rritur rrezikun për efekte të padëshiruara ose duke e bërë terapinë më pak efektive. Rreziku varet nga lloji i medikamentit, doza, sasia e alkoolit të konsumuar dhe gjendja shëndetësore individuale.
Grupet e medikamenteve me rrezikshmëri
• Qetësuesit e dhimbjeve: Përdorimi i paracetamolit (Tylenol), aspirinës apo ibuprofenit bashkë me alkoolin mund të çojë në dëmtim të mëlçisë dhe gjakderdhje gastrointestinale.
• Antidepresantët: Kombinimi mund të shkaktojë përgjumje, marramendje, të përkeqësojë simptomat e depresionit ose ankthit dhe të ndikojë në koordinimin e lëvizjeve.
• Antibiotikët: Barnat si metronidazoli dhe tinidazoli mund të shkaktojnë dhimbje koke, skuqje të fytyrës, të përziera dhe dehidratim, duke vështirësuar rikuperimin.
• Antipsikotikët: Alkooli shton efektin qetësues, duke shkaktuar rënie të presionit të gjakut, vështirësi në frymëmarrje, të fikët, e në raste të rënda, kriza konvulsive apo koma.
• Ilaçet kundër ankthit dhe qetësuesit: Benzodiazepinat (si Xanax dhe Valium) dhe ilaçet për gjumë (si Ambien), kur bashkohen me alkoolin, mund të shkaktojnë përgjumje të theksuar, humbje të kujtesës dhe rrezik kërcënues për jetën.
• Ilaçet për diabetin: Ndërveprimi me insulinën ose sulfonilureat mund të çojë në luhatje të rrezikshme të sheqerit në gjak (hipoglicemi ose hiperglicemi).
• Holluesit e gjakut: Barnat si varfarina mund të humbin efektivitetin ose të rrisin rrezikun për gjakderdhje të brendshme dhe mpiksje të gjakut.
Mjekët, përfshirë Thomas Pontinen, Katy Dubinsky dhe Laura Purdy, rekomandojnë që çdo pacient të konsultohet me profesionistët shëndetësorë përpara konsumimit të alkoolit gjatë një terapie. Në rast të shfaqjes së simptomave si marramendje e fortë, të vjella, vështirësi në frymëmarrje ose humbje të vetëdijes, kërkimi i ndihmës mjekësore është i domosdoshëm.