Aspirina, ilaç i vjetër i përdorur kryesisht për lehtësimin e dhimbjeve dhe reduktimin e inflamacionit, po studiohet për rolin e saj në parandalimin e disa llojeve të kancerit. Studimet e fundit tregojnë se përdorimi i rregullt i saj mund të ulë rrezikun e zhvillimit dhe përhapjes së tumoreve, sidomos atij të zorrës së trashë.
Interesi u rrit nga hulumtimet te pacientët me Sindromën Lynch, një gjendje gjenetike që rrit ndjeshëm rrezikun për kancer. Në një studim afatgjatë, personat që morën aspirinë çdo ditë për disa vite patën rreth 50% më pak raste kanceri se ata që nuk e përdorën. Rezultate të ngjashme vërejtën te pacientët që kishin kaluar kancerin më parë, ku aspirina ul rrezikun e rikthimit.
Shkencëtarët shpjegojnë se aspirina vepron në disa drejtime: redukton inflamacionin, bllokon enzima si COX-2 që nxisin rritjen e pakontrolluar të qelizave, ndikon në mekanizmat e mpiksjes së gjakut dhe ndihmon sistemin imunitar të identifikojë qelizat e dëmshme. Këto zbulime kanë çuar në ndryshime në udhëzimet mjekësore në vende si Britania e Madhe dhe Suedia, ku rekomandohet për persona me rrezik të lartë, gjithmonë nën mbikëqyrjen e mjekut.
Po zhvillohen studime të mëdha për të verifikuar efektet te kancere të tjera, si ai i gjirit, prostatës apo stomakut. Megjithatë, aspirina nuk është pa rreziqe: mund të shkaktojë gjakderdhje të brendshme, ulçera stomaku dhe probleme të tjera, veçanërisht kur merret për kohë të gjatë. Ekspertët këshillojnë kundër përdorimit vetanak, vetëm sipas indikacioneve mjekësore.