Një fëmijë ka rënë pasditen e së dielës në Liqenin Akumulues në Mitrovicë të Jugut. Ai u nxorr nga uji me shenja jete falë reagimit të shpejtë të një qytetari.
Lajmin e konfirmoi Burim Ibishi, komandant i Brigadës së Zjarrfikësve në Mitrovicë të Jugut. Ai deklaroi se rreth orës 15:40 zjarrfikësit u njoftuan nga një qytetar për rënien e fëmijës në ujë dhe menjëherë u nisën drejt vendit të ngjarjes.
"Kur kemi arritur, një qytetar veçse e kishte nxjerrë. Ai qytetar është lënduar në dorë, dyshohet se e ka thyer dorën. Fëmija është nxjerrë i gjallë, ka ardhur emergjenca dhe e ka marrë", tha Ibishi. Ai shtoi se shtatë zjarrfikës intervenuan në vendngjarje.
Ekipet emergjente mbërritën në vend dhe e dërguan fëmijën për trajtim mjekësor në Spitalin Rajonal të Mitrovicës.
Të dy mediat, Bota Sot dhe Koha.net, kanë kontaktuar Policinë e Kosovës dhe Spitalin Rajonal, por nuk kanë marrë informacion shtesë për gjendjen shëndetësore të fëmijës apo detaje të tjera deri në publikimin e lajmit.