FIFA ka filluar shitjen e vendeve të parkimit pranë impianteve sportive për Kupën e Botës 2026 në Shtetet e Bashkuara të Amerikës.
Sipas gazetarit Henry Bushnell të The Athletic, një vend parkimi pranë SoFi Stadium në Los Angeles shitet për rreth 250 deri në 300 dollarë amerikanë. Tifozët kanë shprehur ankesë për çmimin e lartë dhe për vendndodhjen e këtyre hapësirave, pasi distanca deri te stadiumi arrin gati 1500 metra ecje.
Ky zhvillim vjen në kushtet kur transporti publik në SHBA nuk është i zhvilluar si në Europë, duke e bërë të domosdoshëm përdorimin e automjeteve për qasje në strukturat sportive. Shumë impiante sportive aksesohen kryesisht me makina.
Problemet me koston e lartë të ndjekjes së ndeshjeve janë shtuar kohët e fundit. FIFA ka pranuar se nuk mund të parandalojë rishitjen e biletave, pasi kjo praktikë është ligjore në SHBA. Çmimet e biletave kanë shkaktuar pakënaqësi mes tifozëve që synojnë të ndjekin drejtpërdrejt ndeshjet e turneut.