Projektligji i ri për rezervën e hidrokarbureve në Shqipëri ka hyrë në fazën përfundimtare dhe pritet të miratohet së shpejti. Gjatë një takimi me furnizuesit e naftës, ministri i Infrastrukturës dhe Energjisë, Enea Karakaçi, bëri të ditur se drafti është gati dhe i harmonizuar me direktivat e Bashkimit Europian.
Ministri Karakaçi njoftoi se secilës kompani hidrokarbure që vepron në Shqipëri i është dërguar njoftimi për detyrimin e rezervës për vitin 2026, të llogaritur në bazë të xhiros ditore të vitit të kaluar. Grupi në terren ka njoftuar subjektet për verifikimet e nevojshme deri më datën 31 mars. Subjektet kanë detyrimin të mbajnë 31 ditë rezervë hidrokarbure në Shqipëri dhe pjesën tjetër të 60 ditëve të kontraktuar në mekanizma të ndryshëm.
Sipas ministrin Karakaçi, bllokimi i ngushticës së Hormuzit nuk ka pasur impakt në furnizimin me hidrokarbure në vend, pasi kanalet e furnizimit përdorin mekanizma të tjerë dhe rrugë detare alternative.
Ministria e Infrastrukturës dhe Energjisë punon prej dy vitesh për këtë ligj, i cili është konsultuar me publikun para disa muajsh dhe tani ndodhet në fazën përmbyllëse për miratim. Me projektligjin e ri, që përmbush direktivat e Bashkimit Europian dhe të vendit, rezervat e hidrokarbureve nuk do të mbahen më nga kompanitë, por nga agjencia shtetërore.