Donika Gërvalla, zëvendëskryeministrja dhe ministrja e Drejtësisë, mori pjesë në diskutimin në Bibliotekën Kombëtare të Kosovës për promovimin e librit “Hallka më e fortë: Një histori gojore e të mbijetuarave të dhunës seksuale gjatë luftës në Kosovë”, të autores Anna Di Lellio në bashkëpunim me Garentina Kraja.
Gërvalla cilësoi gruan shqiptare si hallkë të fortë që mban shoqërinë mbi supe, e palëkundur përballë dhunës, terrorit dhe padrejtësisë, përdhunimit si armë lufte dhe strategjive të Serbisë për të shkatërruar çdo gjurmë njerëzimi në Kosovë.
“Ajo qëndroi e fortë dhe e guximshme, duke kthyer dhunën në rezistencë dhe tmerrin në histori që nuk mund të fshihet, të falet apo të harrohet. Forca e saj kalon çdo frikë, heshtje apo përpjekje për ta margjinalizuar. Ajo është heroinë e gjallë”, u shpreh ajo.
Libri kontribuon në përpjekjet globale për të kuptuar dhe dokumentuar dhunën seksuale në konflikte, duke e trajtuar si krim që kërkon përgjegjësi institucionale dhe ligjore. Ai dokumenton historinë gojore të 20 grave nga 20.000 që i mbijetuan përdhunimit si armë lufte gjatë luftës në Kosovë.
Gërvalla falënderoi autorja për këtë dokumentim të guximshëm dhe shprehu besimin se përkushtimi për drejtësi për të mbijetuarat dhe të mbijetuarit e dhunës seksuale do t'i detyrojë kriminelët serbë të përballen me përgjegjësinë e tyre. Ajo ritheksoi se guximi i grave shqiptare sfidon heshtjen, frymëzon drejtësi dhe drejtësia në fund triumfon.