Donika Gërvalla, zëvendëskryeministre dhe ministre e Drejtësisë e Kosovës, përshëndeti vendimin e Gjykatës Themelore në Prishtinë për dënimin me 15 vjet burg të Dejan Raçiq për krime lufte, konkretisht dhunën seksuale gjatë luftës në Kosovë.
Ajo theksoi se ky është rasti i katërt kur drejtësia vendase ndëshkon autorët e këtyre krimeve, duke treguar se heshtja dhe mosndëshkueshmëria po i afrohen fundit. Gërvalla deklaroi se rruga drejt drejtësisë mbetet e gjatë, por drejtësia dhe e vërteta në fund fitojnë.
Ministrja falënderoi QKRMT-në për mbështetjen e palëkundur ndaj të mbijetuarve gjatë procesit gjyqësor, si dhe organizatat dhe aktivistët që angazhohen për të mbijetuarat dhe të mbijetuarit e dhunës seksuale gjatë luftës së fundit në Kosovë.
Gërvalla vlerësoi qëndrimin dinjitoz të të mbijetuarve, të cilët dëshmojnë integritet dhe guxim duke u ballafaquar në sallë gjyqi me autorët e krimeve. Sipas saj, këto gra dhe burra meritojnë respektin dhe mbështetjen më të fortë nga institucionet dhe shoqëria.
Deklarata përfundoi me thirrjen: "Drejtësi për të mbijetuarat e dhunës seksuale gjatë luftës në Kosovë."