Qeveria gjermane planifikon që nga janari i vitit 2027 ta përgjysmojë kuotën vjetore për punësimin e shtetasve nga Ballkani Perëndimor, nga 50 mijë në 25 mijë persona. Plani përfshin edhe Kosovën dhe lidhet me Rregulloren për Ballkanin Perëndimor, e cila u mundëson shtetasve të gjashtë vendeve të rajonit të punojnë në Gjermani përmes procedurave të lehtësuara.
Sipas Agjencisë Federale të Punësimit, në shtator të vitit 2026 rreth 546 mijë shtetas të Shqipërisë, Kosovës, Serbisë, Bosnjë-Hercegovinës, Malit të Zi dhe Maqedonisë së Veriut ishin të punësuar në Gjermani dhe paguanin kontribute të sigurimeve shoqërore. Numri i tyre është rritur me rreth 170 mijë gjatë pesë vjetëve të fundit.
Agjencia kërkon që kuota të mbetet në nivelin aktual. Sipas saj, kuota nuk i ka mbuluar të gjitha aplikimet në vitin 2025 dhe pritet të shterohet sërish para përfundimit të vitit 2026. Vanessa Ahuja, anëtare e bordit të Agjencisë Federale të Punësimit përgjegjëse për shërbimet dhe çështjet ndërkombëtare, ka thënë se rregullorja ka ndihmuar integrimin e punëtorëve nga rajoni në tregun gjerman të punës.
Të dhënat e agjencisë tregojnë se 53 për qind, ose rreth 287 mijë punëtorë të përfshirë në skemë, janë në pozita që kërkojnë aftësi profesionale, ndonëse rregullorja nuk kërkon domosdoshmërisht kualifikim formal. Rreth 45 për qind punojnë në profesione ku ka mungesë të fuqisë punëtore. Sektorët e përmendur përfshijnë ndërtimtarinë, transportin, logjistikën, gastronominë dhe kujdesin shëndetësor.
Ahuja ka paralajmëruar se ulja e kuotës mund ta vështirësojë gjetjen e punëtorëve për kompanitë gjermane. Rregullorja është në fuqi që nga viti 2016 dhe zbatohet për shtetasit e Kosovës, Shqipërisë, Serbisë, Bosnjë-Hercegovinës, Malit të Zi dhe Maqedonisë së Veriut. Ajo përfshin edhe punë që nuk kërkojnë kualifikim të veçantë profesional.
Miratimin e punësimit e jep Agjencia Federale e Punësimit, ndërsa kuotat ndahen sipas muajit dhe shtetësisë. Kur kuota përkatëse shterohet, aplikimet e tjera nuk mund të shqyrtohen përmes kësaj rruge deri në hapjen e saj. Plani nuk do ta ndalojë punësimin e kosovarëve në Gjermani, pasi mbeten në dispozicion edhe rrugë të tjera ligjore.