Gjykata e Posaçme Kundër Korrupsionit dhe Krimit të Organizuar (GJKKO) ka rrëzuar kërkesën e të pandehurës Ajola Xoxa për pezullimin e shqyrtimit gjyqësor. Xoxa, nëpërmjet mbrojtësit të saj, kishte kërkuar shtyrjen e procesit për shkak të gjendjes shëndetësore pas lindjes me operacion më 29 qershor 2026.
Në kërkesën e saj, Ajola Xoxa argumentoi se pamundësia fizike për pjesëmarrje në seancë cenon të drejtën për mbrojtje efektive, pasi nuk mund të komunikojë lirisht me avokatët e saj. Megjithatë, trupi gjykues, i kryesuar nga Elsa Ulliri, vlerësoi se raporti mjekësor i paraqitur nuk përbën raport paaftësie për punë që do të justifikonte pezullimin e gjykimit.
Prokurori i posaçëm, Altin Dumani, kundërshtoi kërkesën e palës mbrojtëse, duke theksuar se legjislacioni nuk parashikon pezullimin e procesit për këtë shkak. Dumani sugjeroi madje mundësinë e ndarjes së çështjes së Xoxës nga ajo e të pandehurve të tjerë, nëse prania e saj fizike konsiderohej e domosdoshme nga gjykata.
Ndërkohë, procesi gjyqësor vazhdon për bashkëshortin e saj, kryebashkiakun Erion Veliaj, i cili prej kohësh është shfaqur refuzues për pjesëmarrjen në sallë për shkak të kundërshtimit ndaj kafazit të qelqtë. Gjykata ka vendosur që seanca e radhës të zhvillohet më 21 korrik, në orën 10:00, duke synuar krijimin e mundësive për pjesëmarrjen e të pandehurës Xoxa. Njëkohësisht, gjykata ka vendosur pezullimin e afateve të paraburgimit për Erion Veliajn deri në zhvillimin e seancës së ardhshme.
Përditësime
Gjykata e Posaçme Kundër Korrupsionit dhe Krimit të Organizuar (GJKKO) ka rrëzuar kërkesën e Ajola Xoxës për shtyrjen e gjykimit me 63 ditë, deri më 31 gusht. Sipas Prokurorisë, çështja lidhet me një skemë përfitimesh të paligjshme nga kontrata publike dhe leje ndërtimi, ku dyshohet se janë të përfshira organizatat e drejtuara nga Xoxa. Kryetari i Bashkisë së Tiranës, Erion Veliaj, ndodhet në paraburgim që prej 10 shkurtit 2025 në kuadër të të njëjtit hetim.
Avokati Maks Haxhia sqaroi se kërkesa e mbrojtjes për Ajola Xoxën nuk synon pezullimin e procesit, por shtyrjen e seancës për shkak të lejes së lindjes, bazuar në raportet mjekësore. Në të njëjtën seancë, GJKKO rrëzoi kërkesën e kryebashkiakut Erion Veliaj për transmetim live të procesit, i cili gjithashtu kërkoi zyrtarisht përfaqësimin nga avokati Plarent Ndreca.