Një qytetar është ndëshkuar me një gjobë prej 200 euro nga Inspektorati i Kryeqytetit, për shkak të hedhjes së mbeturinave vëllimore në kundërshtim me rregulloret në fuqi. Shkelja u evidentua gjatë inspektimeve të rregullta në terren që po zhvillohen nga autoritetet komunale.
Në një njoftim zyrtar, Komuna e Prishtinës bëri të ditur se aksionet e monitorimit do të vazhdojnë çdo ditë, me qëllim ruajtjen e pastërtisë së hapësirave publike. Autoritetet paralajmëruan se çdo shkelës do të përballet me masa ndëshkuese, duke apeluar te qytetarët që të tregojnë përgjegjësi për mjedisin.
"Inspektimet në terren po vazhdojnë çdo ditë dhe secili shkelës do të përballet me masa ndëshkuese. Ta mbajmë Kryeqytetin të pastër, përgjegjësia është e përbashkët", thuhet në njoftimin e komunës.