Inspektorati i Komunës së Prishtinës ka shqiptuar gjobë prej 500 euro një qytetari të kapur në flagrancë duke hedhur mbeturina në një hapësirë publike të kryeqytetit.
Rasti është regjistruar gjatë orëve të vona të natës, në kuadër të kontrolleve të rregullta që zhvillohen nga ekipet e Drejtorisë së Shërbimeve Publike dhe Inspektoratit. Drejtoria ka njoftuar se aksionet për largimin e mbeturinave vëllimore në lagje të ndryshme të Prishtinës po vazhdojnë çdo ditë.
Pavarësisht këtyre angazhimeve, institucionet thonë se ende ndodhin raste të hedhjes së mbeturinave në mënyrë të paligjshme, të cilat dëmtojnë mjedisin dhe hapësirat publike. Komuna ka paralajmëruar se kontrollet dhe inspektimet do të intensifikohen në ditët në vijim dhe se shkelësit do të përballen me masa ndëshkuese sipas legjislacionit në fuqi.
Qytetarët janë ftuar të raportojnë raste të tilla në numrat pa pagesë 0800 12233 dhe 0800 12244.