Gjykata e Apelit ka kthyer në rigjykim rastin e Çedomir Aksiqit, i dënuar në mungesë me 15 vjet burgim nga Gjykata Themelore në Prishtinë për pjesëmarrje në krime lufte gjatë masakrës së Reçakut më 1999, ku u vranë 45 civilë shqiptarë.
Departamenti Special i Apelit ka pranuar ankesën e mbrojtësit të të akuzuarit dhe ka anuluar aktgjykimin e shkallës së parë. Kolegji ka gjetur se aktgjykimi përmban shkelje esenciale të dispozitave të procedurës penale, sipas nenit 384, paragrafi 1, nënparagrafi 1.3 të Kodit të Procedurës Penale (KPP).
Gjykimi është zhvilluar në mungesë të Aksiqit pa u përmbushur kushtet ligjore të nenit 303, paragrafët 7 dhe 8 të KPP-së. Apeli thekson se nuk janë ndërmarrë përpjekje të arsyeshme për njoftimin e të akuzuarit për shqyrtimin gjyqësor dhe për sigurimin e pranisë së tij.
Gjykata Themelore nuk e ka zbatuar drejt nenin 303, paragrafi 8 të KPP-së. Nga shkresat e lëndës rezulton mungesë provash për publikimin e ftesës për seancë dhe të aktakuzës. Gjykata e parë ka anashkaluar kushtin kumulativ për zhvillimin e një fushate informative të plotë, e cila është parakusht për gjykimin në mungesë.