Gjykata e Lartë në Londër ka vendosur të bllokojë përkohësisht ekstradimin drejt Shqipërisë të pesë personave të dyshuar për përfshirje në vrasjen e Ardian Nikulajt, e ndodhur në prill 2023 në Shëngjin. Vendimi u mor paraditen e së premtes nga gjykatësi Justice Swift, i cili pranoi kërkesën e mbrojtjes për Thomas Mithan, Harriet Bridgeman, Harry Simpson, Steven Hunt dhe Edmond Haxhisë.
Sipas Prokurorisë së Lezhës, Haxhisë konsiderohet organizatori i vrasjes. Gjykata pranoi argumentin se ish-sekretarja e shtetit britanik për Punët e Brendshme, Yvette Cooper, kishte nënshkruar urdhërin e ekstradimit me akuzat fillestare për vrasje për gjakmarrje, të cilat u ndryshuan më vonë në vrasje në bashkëpunim me paramendim. Për këtë arsye, urdhër-arrestet e shndërruara në urdhra ekstradimi u shpallën të pavlefshme.
Një argument tjetër i pranuar lidhet me garancitë e dhëna nga prokurorët e Lezhës se të dyshuarit nuk do të akuzoheshin për gjakmarrje. Këto garanci nuk kanë më fuqi vepruese, pasi prokurorët që i lëshuan nuk janë më pjesë e sistemit të drejtësisë shqiptare për shkak të vetting-ut.
Prokuroria britanike, e cila përfaqëson interesat e Republikës së Shqipërisë, njoftoi se ka dhënë njoftim për synimin e kërkimit të lejes për ankesë në Gjykatën Supreme, sipas nenit 114 të Aktit të Ekstradimit 2003.
Edmond Haxhisë, Thomas Mithan, Harry Simpson dhe Steven Hunt do të vazhdojnë të mbahen në paraburgim, ndërsa Harriet Bridgeman është lënë në liri me kusht.