Kryetari i Grupit Parlamentar të Partisë Demokratike, Gazment Bardhi, ka reaguar lidhur me seancën që pritet të zhvillohet në Gjykatën e Lartë për rishqyrtimin e masës së sigurisë ndaj kryebashkiakut të Tiranës, Erion Veliaj. Kjo seancë vjen pas rikthimit të çështjes nga Gjykata Kushtetuese.
Sipas Bardhit, lirimi i Veliajt do të përbënte aktin përfundimtar të asaj që ai e quajti 'funerali i Reformës në Drejtësi'. Në deklaratën e tij, deputeti opozitar theksoi se kryebashkiaku i Tiranës po mbahet në paraburgim për katër vepra të rënda penale, për të cilat është marrë i pandehur nga SPAK:
• 9 raste korrupsioni të kryera në bashkëpunim;
• Pastrim parash, të kryer në bashkëpunim më shumë se një herë;
• Fshehje pasurie;
• Shpërdorim detyre.
Gazment Bardhi ka akuzuar kryeministrin Edi Rama se po ndërmerr përpjekje për të ndikuar te trupi gjykues, me qëllim lirimin e Veliajt. Për këtë arsye, ai u ka bërë thirrje partnerëve ndërkombëtarë që të ndjekin me vëmendje procesin në Gjykatën e Lartë, duke e konsideruar këtë rast si një standard për matjen e luftës kundër korrupsionit të nivelit të lartë në vend. Bardhi iu drejtua gjyqtarëve me kërkesën për të qëndruar në lartësinë e detyrës dhe për të mos krijuar standarde të dyfishta mes qytetarëve dhe personave që ushtrojnë pushtet.