Gjykata e Posaçme refuzoi pak ditë më parë kërkesën e një banke të nivelit të dytë për lirimin nga sekuestro të automjetit luksoz "Lamborghini Urus", me vlerë 160 mijë euro.
Mjeti është një nga pasuritë e sekuestruara nga SPAK si pronë e Aurel Hoxhës, i njohur edhe si Aurelinjo Kalaveri dhe Sajmir Kolaveri. Personi në fjalë është shpalur në kërkim nga strukturat hetimore, pasi dyshohet të jetë porositës i rrëmbimit dhe vrasjes për hakmarrje të Klevis Lleshit, ngjarje e ndodhur 5 vite më parë në Burrel.
Pretendimi i bankës
Banka e nivelit të dytë parashtroi në gjykim se ajo ishte pronare ligjore e mjetit luksoz. Sipas bankës, ajo e kishte blerë automjetin nga një shoqëri tregtare në Tiranë në vlerën 160 mijë euro. Banka pretendoi se personi të cilit i ishte sekuestruar automjeti e kishte me qira, dhe se kjo pasuri nuk kishte lidhje me asnjë fakt penal. Në këtë bazë, ajo kërkonte që "Lamborghini"-n të lirohej nga sekuestro.
Pozicioni i SPAK-ut
SPAK-u, megjithatë, kundështoi këtë qëndrim të bankës. Prokuroria speciale pretendoi se automjeti luksoz ka qenë në pronësi të një shoqërie, e cila de fakto zotërohej nga Aurelinjo Kolaveri, para se të bëhej pronë e shoqërisë tregtare nga ku e bleu banka. Referuar vëzhgimit të SPAK-ut, rezultonte se mjeti ishte përdorur nga ai, edhe para edhe pasi u ble nga institucioni financiar.
Vendimi i gjykatës
Gjykata e Posaçme, pasi dëgjoi argumentet e palëve, u bind nga pozicioni i SPAK-ut dhe vendosi të refuzojë kërkesën e bankës për lirimin nga sekuestro.
"Lamborghini Urus"-i përfaqëson vetëm një pjesë të pasurive të sekuestruara ndaj dyshuarve. Në total, SPAK-u ka sekuestruar pasuri të luajtshme e të paluajtshme me vlerë gati 5 milionë euro ndaj Kalaverit dhe të dyshuarve të tjerë, të cilët akuzohen se janë anëtarë të një grupi kriminal të drejtuar nga Aurelinjo Kolaveri. Sekuestrimi i këtyre pasurive përfaqëson pjesë të rëndësishme të hetimit në lidhje me kriminalitetin e organizuar dhe veprat e dhunës për hakmarrje.