Gjykata Themelore në Prishtinë ka miratuar padinë e veteranit Agim Pllashniku kundër Ndërmarrjes Hidroekonomike Ibër-Lepenc, duke e vlerësuar si të kundërligjshëm vendimin për ndërprerjen e marrëdhënies së tij të punës. Me aktgjykimin e datës 28 korrik 2026, gjykata ka anuluar vendimet e ndërmarrjes dhe ka urdhëruar kthimin e Agim Pllashnikut në vendin e punës si Zyrtar i Autoparkut.
Sipas vendimit të gjykatës, ndërmarrja Ibër-Lepenc është detyruar t'i paguajë paditësit pagat e papaguara për periudhën nga 31 korriku 2025 deri më 16 prill 2026, në vlerën prej 8,647.81 euro. Kjo shumë do të shoqërohet me kamatën ligjore prej 8 për qind, si dhe me shlyerjen e kontributeve pensionale dhe tatimeve përkatëse. Gjithashtu, është urdhëruar pagesa mujore prej 1,163.25 euro nga dita e shpalljes së aktgjykimit deri në ekzekutimin e plotë të tij.
Në arsyetimin e saj, gjykata konstatoi se punëdhënësi nuk ka arritur të dëshmojë shkeljet disiplinore të pretenduara dhe se procedurat ligjore për shkëputjen e marrëdhënies së punës nuk janë zbatuar sipas kërkesave ligjore. Ndërmarrja është urdhëruar gjithashtu të mbulojë shpenzimet e procedurës kontestimore në shumën prej 748 euro.