Autoritetet greke po hetojnë dy rrjete biznesesh, furrat e bukës Horiatiko dhe piceritë Pizza Fan, për skema të dyshuara evazioni fiskal. Drejtuesit e tyre dyshohet se nuk i kanë derdhur në shtet paratë e TVSH-së të paguara nga klientët. Sipas hetimeve, njëra skemë mbështetej te përdorimi i administratorëve fiktivë, ndërsa tjetra te regjistrimi i shitjeve të paguara si produkte të dhëna falas.
Policia greke arrestoi pronarin e Horiatiko dhe një kontabilist, i cili dyshohet se organizonte mekanizmin e shmangies së detyrimeve. Televizioni publik grek ERT raportoi se numri i të arrestuarve ka kaluar 50, ndërsa kontrollet janë shtrirë në qindra biznese.
Sipas hetuesve, në dokumentet e kompanive regjistroheshin si administratorë persona që nuk e kontrollonin realisht veprimtarinë. Bizneset vijonin punën, kryenin shitje dhe grumbullonin detyrime për taksat dhe sigurimet shoqërore. Kur borxhet mbeteshin të papaguara, kompanitë liheshin me detyrimet, ndërsa aktiviteti zhvendosej te shoqëri të reja. Shteti u kërkonte pagesat personave të regjistruar në dokumente, ndërsa drejtuesit faktikë qëndronin të fshehur.
Vlerësimet paraprake për rastin Horiatiko e vendosin dëmin dhe detyrimet e papaguara në rreth 100 milionë euro. Shuma përfshin kontributet e sigurimeve shoqërore dhe veprimtari të tjera të pronarit, përtej rrjetit të furrave.
Në rastin e Pizza Fan, dëmi fillestar i dyshuar nga TVSH-ja e paderdhur llogaritet në të paktën 25 milionë euro. Sipas hetuesve, klientët porosisnin pica dhe paguanin me para në dorë, por një program kompjuterik mundësonte që një pjesë e porosive të regjistrohej si “qerasje”. Kështu, shitja nuk deklarohej dhe TVSH-ja e përfshirë në çmim nuk i kalonte shtetit.
Pizza Fan e kundërshton këtë përshkrim. Kompania thotë se ofertat e shumta me produkte falas mund të kenë krijuar paqartësi në përllogaritjen e xhiros dhe shprehet e gatshme të bashkëpunojë me drejtësinë.
Hetimet vijojnë në të dyja dosjet. Në njërën po gjurmohen borxhet e mbetura te kompanitë e regjistruara, ndërsa në tjetrën po hetohen shitjet që dyshohet se janë fshirë ose zhdukur nga sistemi kompjuterik. Ndërprerja e shërbimit të Pizza Fan ka shtuar pasigurinë për më shumë se 2.500 punonjës. Kompania thotë se synon të rihapë dyqanet sa më shpejt dhe të ruajë vendet e punës.