Një grua ka vdekur më 21 mars 2026 pas rënies në ujë nga Ura e Moglicës në Gjakovë. Sipas Spitalit të Përgjithshëm "Isa Grezda", pacientja u soll rreth orës 20:15 në Shërbimin e Emergjencës nga ekipi i Urgjencës së Mjekësisë Familjare. Ajo paraqitej me shenja jete, në gjendje të rëndë politraume dhe e pavetëdijshme, me tension arterial 210/100 mmHg.
Ekipi mjekësor ndërmori menjëherë masat emergjente sipas protokolleve, duke përfshirë intubimin endotrakeal dhe reanimimin kardiopulmonar. Pavarësisht përpjekjeve të vazhdueshme, pacientja nuk reagoi ndaj terapisë dhe ndërrroi jetë në orën 21:20.
Rreth orës 22:00, me asistencën e Policisë së Kosovës, u bë identifikimi i viktimës. Spitali i Përgjithshëm "Isa Grezda" shprehu keqardhje për rastin dhe dërgoi ngushëllimet familjarëve.
Policia e Kosovës konfirmoi se viktima, një grua kosovare, kishte rënë në ujë nga ura dhe u tërhoq nga një qytetar kalimtar. Stafi mjekësor i dha ndihmën e parë në vendngjarje, pastaj e dërgoi në spital. Pas vdekjes, trupi u dërgua në Institutin e Mjekësisë Ligjore për obduksion me vendim të prokurorit.