Prokuroria Themelore Publike e Velesit po heton një person të dyshuar se ka mashtruar disa qytetarë duke u ofruar në mënyrë të rreme vaksina të ashtuquajtura “kubaneze” kundër kancerit, me qëllim përfitimin e kundërligjshëm material. Procedura përfshin dyshime për mashtrim, sipas nenit 247, dhe ushtrim të paligjshëm të veprimtarisë mjekësore, sipas nenit 209 të Kodit Penal.
Prokuroria ka siguruar urdhra për bastisje në disa lokacione. Gjatë kontrollit në vendin e punës së të dyshuarit në Veles, u gjetën prova që do t’i nënshtrohen ekspertizës së mëtejshme dhe u sekuestruan pajisje elektronike. Organet hetimore po vijojnë verifikimet për të sqaruar rrethanat e rastit.
Sipas të dhënave të deritanishme të prokurorisë, i dyshuari u paraqitej disa personave në mënyrë të rreme si ofrues i vaksinave kundër kancerit nga Kuba. Prokurori publik po merr në pyetje personat e dëmtuar dhe qytetarë të tjerë që mund të kenë informacione me rëndësi për hetimin.
Prokuroria i ka kërkuar gjykatës caktimin e masave të kujdesit: konfiskimin e dokumentit të udhëtimit dhe detyrimin e të dyshuarit që të paraqitet rregullisht në gjykatë. I dyshuari ndodhet i shtruar në një institucion shëndetësor, ku i është dorëzuar vendimi për caktimin e masave.
Prokuroria Publike dhe Ministria e Punëve të Brendshme po bashkëpunojnë për mbledhjen e provave dhe vijimin e verifikimeve. Sipas prokurorisë, po mbërrijnë edhe informacione shtesë që mund të ndihmojnë hetimin.