Këtë të diel është hequr teli me gjemba nga rrethimi i kantierit të ndërtimeve në Zvërnec, veprim ky që pason incidentet e dhunshme të një dite më parë. Protestat e banorëve në këtë zonë janë nxitur nga kundërshtimi ndaj projektit të ndërtimit, për shkak të pretendimeve për probleme me pronësinë dhe ndikimin mjedisor në një zonë të mbrojtur.
Në lidhje me përplasjen mes protestuesve dhe rojeve private, ka reaguar ministri i Punëve të Brendshme, Besfort Lamallari. Ai e ka cilësuar të papranueshme sjelljen e punonjësve të sigurisë, duke shtuar se edhe reagimi i efektivëve të policisë, të cilët kanë qenë të pranishëm në vendngjarje, ka qenë i pajustifikueshëm për shkak të indiferencës së treguar.
Ndërkohë, autoritetet policore kanë vënë në pranga 32-vjeçarin Gerald Biba, i angazhuar si roje private në kantier. Ndaj tij rëndojnë akuzat për veprat penale “Heqja e paligjshme e lirisë” dhe “Plagosja e lehtë me dashje”. Sipas hetimeve, i arrestuari, në bashkëpunim me dy persona të tjerë të proceduar penalisht, ka goditur me grusht një protestues dhe më pas e ka tërhequr me forcë, duke i shkaktuar dëmtime fizike. Kjo ngjarje ka rindezur debatin publik mbi mënyrën e administrimit të protestave dhe sigurinë në kantieret private.