Qeveria e Holandës planifikon të shkurtojë rreth 20% të vendeve të punës në sektorin publik gjatë dekadës së ardhshme, me synimin për të rritur efikasitetin e administratës dhe për të kursyer rreth 3.5 miliardë euro. Sipas planit, numri i pozicioneve me kohë të plotë pritet të ulet me rreth 25 mijë gjatë dhjetë viteve të ardhshme.
Inteligjenca Artificiale pritet të luajë rol në zbatimin e planit. Qeveria holandeze ka bërë të ditur se deri në tremujorin e parë të vitit 2027 do të paraqesë plane të hollësishme për mënyrën se si teknologjia mund të ndihmojë në uljen e kostove dhe përmirësimin e efikasitetit të administratës.
Nisma vjen pas përpjekjeve të ngjashme të qeverive të mëparshme për të kufizuar përmasat e sektorit publik. Megjithatë, punësimi në administratën publike holandeze është rritur vitet e fundit. Që nga viti 2018, janë krijuar rreth 46 500 vende të reja pune, duke e rritur fuqinë punëtore me afërsisht 40%.
Plani i ri synon të ndryshojë këtë prirje dhe ta orientojë administratën drejt një strukture më të vogël e më efikase. Teknologjia përmendet si një nga mjetet për pakësimin e shpenzimeve publike.