Një qytetar 75-vjeçar nga Tirana, i cili ndodhej për pushime me familjen e tij, ka ndërruar jetë si pasojë e një problemi të papritur shëndetësor në plazhin e Orikumit. Ngjarja është regjistruar paraditen e së enjtes, rreth orës 11:30, kur pushuesi është ndier keq sapo ka hyrë në det.
Sipas dëshmive, i moshuari ka dalë drejt bregut, ku ka humbur ndjenjat. Familjarët dhe pushuesit e tjerë kanë kërkuar ndihmë të menjëhershme, duke mundësuar mbërritjen e shpejtë të personelit mjekësor të ambulancës së Orikumit. Pavarësisht përpjekjeve për reanimim, mjekët nuk kanë mundur ta rikthejnë atë në jetë.
Sipas të dhënave paraprake, dyshohet se shkaku i vdekjes është një infarkt kardiak. Autoritetet përkatëse vijojnë veprimet procedurale për konfirmimin e plotë të rrethanave të ngjarjes.