Një rast tragjik është regjistruar në Qendrën Korrektuese të Dubravës, ku një i burgosur ka ndërruar jetë. Sipas njoftimit zyrtar të përbashkët të Shërbimit Korrektues të Kosovës (SHKK) dhe Departamentit Shëndetësor të Burgjeve (DSHB), viktima është identifikuar me inicialet K.N.
Ngjarja ka ndodhur në Pavijonin D, sektor i dedikuar për personat me nevoja të veçanta. Zyrtarët korrektues kanë hasur në një rast të dyshuar për vetëvarje dhe kanë ndërhyrë menjëherë për t'i ofruar ndihmën e parë të burgosurit. Pas ndërhyrjes fillestare nga personeli mjekësor i qendrës, i burgosuri është transportuar me urgjencë për në Spitalin Rajonal në Pejë.
Megjithatë, pavarësisht përpjekjeve të stafit korrektues dhe atij mjekësor, i burgosuri nuk ka arritur të mbijetojë. Lidhur me këtë ngjarje, janë njoftuar Policia e Kosovës dhe prokurori kompetent. SHKK dhe DSHB kanë bërë të ditur se janë iniciuar procedurat hetimore dhe administrative për të sqaruar rrethanat e plota të këtij rasti.