Në orët e para të mëngjesit të datës 28 qershor 2026, në Institucionin e Ekzekutimit të Vendimeve Penale (IEVP) në Shkodër, është regjistruar një emergjencë shëndetësore që ka çuar në ndarjen nga jeta të një të paraburgosuri. Shtetasi me inicialet Ç. J., i datëlindjes 10 nëntor 1964, i cili ishte i akomoduar në të njëjtën dhomë me të birin, të burgosurin me inicialet D. J., ka pësuar një përkeqësim të papritur të gjendjes shëndetësore.
Sipas njoftimit zyrtar nga Drejtoria e Përgjithshme e Burgjeve, personeli mjekësor i institucionit ka ndërhyrë menjëherë për t'i dhënë ndihmën e parë. Për shkak të rëndimit të gjendjes, ai është transportuar me urgjencë drejt Spitalit të Koplikut. Pavarësisht përpjekjeve të stafit mjekësor për reanimimin kardiorespirator gjatë transportit dhe pas mbërritjes në urgjencën spitalore, pacienti ka ndërruar jetë.
Autoritetet kanë njoftuar menjëherë organet kompetente për të kryer veprimet procedurale dhe për të sqaruar rrethanat e ngjarjes. Drejtoria e Përgjithshme e Burgjeve ka shprehur ngushëllimet për familjen e të ndjerit dhe ka garantuar bashkëpunim të plotë me organet e drejtësisë për zbardhjen e plotë të rastit.