Në Institutin e Ekzekutimit të Vendimeve Penale (IEVP) Shkodër ka ndërruar jetë paraditen e 25 janarit 2026 shtetasi Nicolae Ionnut Erion Deliver, i datëlindjes 23 mars 2005, lindur në Rumani dhe banues në Shkodër.
Ky i paraburgosur ishte arrestuar më 7 tetor 2024 dhe akomoduar në IEVP Shkodër më 10 tetor 2024, me masë sigurimi "arrest në burg", për veprat penale "Vjedhje me dhunë" dhe "Prodhim dhe shitje e narkotikëve".
Sipas njoftimit zyrtar të Drejtorisë së Përgjithshme të Burgjeve, shtetasi është konstatuar nga personeli duke qëndruar në shtrat. Pas vlerësimit mjekësor janë evidentuar parametra jetësorë të ulët, i është dhënë ndihma e parë mjekësore dhe është rekomanduar dërgimi në urgjencën e spitalit rajonal.
Ai është transportuar menjëherë drejt Spitalit të Koplikut, strukturës më të afërt shëndetësore, ku gjatë rrugës ka marrë ndihmë të vazhdueshme nga stafi mjekësor. Në urgjencë i është dhënë ndihma e menjëhershme, por mjeku ka konstatuar vdekjen (exitus letalis).
Drejtoria e Përgjithshme e Burgjeve njofton se ka informuar menjëherë organet kompetente dhe po bashkëpunon për sqarimin e plotë të rrethanave, në përputhje me procedurat ligjore. Institucioni shpreh gatishmërinë për të vënë në dispozicion çdo informacion të mëtejshëm sipas ligjit.
Një burim raporton dyshime për vonesë në ndihmën mjekësore dhe lidh ngjarjen me probleme në sistemin penitenciar, si mungesë shërbimi shëndetësor dhe raste të mëparshme në IEVP Shkodër, përfshirë vdekjen e Brendon Ronald Saporito pak muaj më parë.