Instituti i Kosovës për Drejtësi (IKD) ka reaguar publikisht lidhur me dështimin e Departamentit të Pensioneve në Ministrinë për Punë, Familje dhe Vlerat e Luftës Çlirimtare (MPFVLÇ) për të zbatuar aktgjykimet gjyqësore që u njohin qytetarëve të drejtën për pension të dyfishtë. Sipas të dhënave nga Qendra për Ndihmë Juridike Falas e IKD-së, ky fenomen nuk përbën një rast të izoluar, por një praktikë që cenon sigurinë juridike dhe parimin e autoritetit të vendimeve gjyqësore.
Sipas organizatës, ekzistojnë raste ku ministria vazhdon të mos i ekzekutojë vendimet edhe pas përfundimit të procedurave të plota gjyqësore, përfshirë ato të konfirmuara nga Gjykata Supreme. Për më tepër, IKD raporton se kur gjykata anulon një vendim administrativ dhe e kthen çështjen në rivendosje, ministria në disa raste nxjerr përsëri vendime refuzuese duke përdorur të njëjtin arsyetim, pa marrë parasysh udhëzimet dhe qëndrimin juridik të gjykatës.
Ky veprim detyron qytetarët të përfshihen në procedura të vazhdueshme administrative dhe gjyqësore për të njëjtën çështje, çka sipas IKD-së bie ndesh me parimin e "res judicata". Për këtë arsye, Instituti ka theksuar se moszbatimi i një aktgjykimi të plotfuqishëm mund të përbëjë vepër penale sipas nenit 394 të Kodit Penal, me dënime që mund të arrijnë deri në pesë vjet burgim. Gjithashtu, sipas IKD-së, në varësi të rrethanave, mund të ngrihen edhe dyshime për keqpërdorim të pozitës apo autoritetit zyrtar sipas nenit 414 të Kodit Penal.
Në këto rrethana, IKD i ka bërë thirrje MPFVLÇ-së që:
• Të evidentojë dhe të zbatojë menjëherë të gjitha aktgjykimet e formës së prerë.
• Të kryejë pagesat që burojnë nga këto vendime.
• Të ndalojë nxjerrjen e vendimeve të reja që janë në kundërshtim me qëndrimet e gjykatave.
Njëkohësisht, IKD ka kërkuar nga Prokurori i Shtetit që të hetojë këto raste për të vlerësuar elementet e veprës penale për mosekzekutimin e vendimeve gjyqësore.