Për shkak të valës së të nxehtit që ka përfshirë vendin, Instituti Kombëtar i Shëndetësisë Publike të Kosovës (IKSHPK) ka dalë me një njoftim zyrtar për të mbrojtur shëndetin e qytetarëve nga pasojat e temperaturave të larta.
Ekspertët shëndetësorë këshillojnë qytetarët që të zbatojnë këto masa mbrojtëse:
• Konsumimi i rregullt i ujit për të shmangur dehidratimin.
• Ushqyerja me produkte të lehta dhe të freskëta, si frutat dhe perimet.
• Shmangia e pijeve alkoolike dhe atyre me përmbajtje të lartë sheqeri.
• Kufizimi i kafesë dhe i aktiviteteve fizike gjatë orëve më të nxehta të ditës.
• Përdorimi i rrobave të lehta dhe freskimi i trupit me ujë në mënyrë të rregullt.
Sipas njoftimit të IKSHPK-së, është thelbësore që qytetarët të shmangin ekspozimin e panevojshëm ndaj rrezeve të diellit. Kujdes të shtuar duhet të tregojnë kategoritë më të ndjeshme të popullsisë, siç janë të moshuarit, fëmijët dhe personat me sëmundje kronike, pasi ata janë më të rrezikuar nga komplikimet shëndetësore që mund të shkaktohen nga vapa e madhe.