Për shkak të rritjes së temperaturave, Instituti Kombëtar i Shëndetësisë Publike të Kosovës (IKSHPK) u ka bërë thirrje qytetarëve që të zbatojnë masat mbrojtëse për të ruajtur shëndetin. Institucioni ka paralajmëruar se vapa ekstreme paraqet rrezik të shtuar, veçanërisht për fëmijët, të moshuarit dhe personat që vuajnë nga sëmundje kronike.
Ndër rekomandimet kryesore të dhëna nga IKSHPK për popullatën janë:
• Hidratimi i vazhdueshëm me ujë dhe shmangia e pijeve me sheqer apo alkool.
• Kufizimi i lëvizjeve në ambiente të hapura gjatë intervalit kohor 11:00 – 17:00.
• Përdorimi i rrobave të lehta, prej pambuku dhe me ngjyra të hapura.
• Përdorimi i kremit mbrojtës nga dielli, si dhe mbrojtja e syve dhe kokës me syze e kapelë.
Instituti ka ngritur një alarm të veçantë për sigurinë e fëmijëve, duke theksuar se lënia e tyre brenda automjeteve, edhe për pak minuta, është e rrezikshme për jetën për shkak të rritjes së shpejtë të temperaturave në hapësirat e mbyllura.
Qytetarët janë këshilluar gjithashtu të jenë të vëmendshëm ndaj simptomave të goditjes nga nxehtësia, si marramendja, lodhja dhe dhimbjet e kokës. Në rast të shfaqjes së shenjave të përkeqësimit të gjendjes shëndetësore, institucioni ka kërkuar nga qytetarët që të kërkojnë menjëherë ndihmën e personelit mjekësor.