Instituti i Shëndetit Publik (ISHP) ka lëshuar një sërë rekomandimesh për popullatën për shkak të temperaturave të larta të cilat pritet të mbizotërojnë deri më 7 gusht. Sipas autoriteteve shëndetësore, kur temperaturat e ajrit i afrohen ose tejkalojnë 36,7°C, organizmi e ka të vështirë të termorregullohet, veçanërisht nëse lagështia e ajrit është e lartë. Kjo gjendje mund të shkaktojë marramendje, të përziera, dobësi dhe në raste të rënda, goditje nga dielli.
Masat mbrojtëse dhe këshillat shëndetësore
Qytetarët këshillohen të ndjekin këto rregulla për të shmangur dehidratimin dhe rreziqet shëndetësore:
• Shmangia e ekspozimit të drejtpërdrejtë në diell dhe aktiviteteve fizike në natyrë gjatë orarit 11:00–17:00.
• Veshja e rrobave të lehta dhe të ndritshme, përdorimi i kapeleve me strehë të gjerë dhe syzeve mbrojtëse.
• Qëndrimi në ambiente të mbyllura me ajër të kondicionuar, mbajtja e dritareve dhe perdeve të mbyllura gjatë ditës dhe hapja e tyre gjatë natës.
• Konsumimi i sasive të mjaftueshme të ujit dhe pijeve minerale joalkoolike gjatë gjithë ditës, pa pritur ndjesinë e etjes, dhe shmangia e alkoolit, kafeinës dhe ushqimeve yndyrore.
• Monitorimi i shëndetit për simptoma si marramendje, dhimbje koke, apo ndërprerje të djersitjes.
Kujdes i veçantë për grupet vulnerabël
Instituti thekson se personat me sëmundje kronike, si ato kardiovaskulare, të mushkërive, veshkave, diabeti, apo sëmundjet neurologjike, duhet të tregojnë disiplinë të lartë në marrjen e terapisë së përshkruar. Gjithashtu, punëtorët në natyrë dhe personat socialisht të cenueshëm janë ndër grupet më të rrezikuara.
Në lidhje me automjetet, ISHP paralajmëron se temperaturat brenda tyre mund të arrijnë nivele ekstreme në kohë shumë të shkurtra. Prandaj, ndalohet lënia e fëmijëve, të moshuarve apo kafshëve shtëpiake në automjete të parkuara; nëse duhet qëndruar në to, duhet siguruar ventilim përmes dritareve.
Në raste emergjente, kur një person shfaq konfuzion, lëkurë jashtëzakonisht të nxehtë apo humbje të vetëdijes, qytetarët duhet të kërkojnë ndihmë mjekësore urgjente duke telefonuar numrat 194 ose 112. Deri në mbërritjen e ekipeve mjekësore, pacienti duhet të vendoset në një vend të freskët dhe në pozicion horizontal.
Përditësime
Instituti i Shëndetit Publik (ISHP) ka zgjeruar listën e grupeve vulnerabël ndaj temperaturave ekstreme, të cilat pritet të vijojnë deri më 7 gusht. Në këtë grup përfshihen gratë shtatzëna, personat mbi 60 vjeç, si dhe individët me obezitet ose sëmundje mendore. Ekspertët tërheqin vëmendjen se medikamentet për epilepsinë, Parkinsonin dhe diuretikët ndikojnë në termorregullimin e trupit, duke shtuar rrezikun shëndetësor. ISHP kërkon monitorim të kujdesshëm për simptoma si takikardia dhe vështirësitë në frymëmarrje.