Instituti Albanologjik në Prishtinë do të mbajë nesër mbledhje komemorative në nderim të akademikut dhe shkrimtarit Rexhep Qosja, pas ndarjes së tij nga jeta.
Instituti ka njoftuar se mbledhja zhvillohet në orën 12:00. Në njoftim thuhet: «Ikonë e mendimit dhe shkrimit shqip nuk është më mes nesh. Sot ka ndërruar jetë akademiku i madh, profesori ynë i nderuar, udhëzuesi dhe mendimtari i jashtëzakonshëm, Rexhep Qosja. Rexhep Qosja ishte një punonjës i papërsëritshëm i Institutit Albanologjik dhe ne, punonjësit e tashëm të tij, jemi krenarë që e patëm mes nesh. Ai ishte mësuesi ynë, bashkëpunëtori dhe miku që nderohej dhe respektohej në secilin hap të ecejakeve të tij shkencore dhe intelektuale. Do të na mungojnë këshillat e tij të vyeshme dhe udhëzimet akademike!».
Rexhep Qosja ka ndërruar jetë në moshën 89-vjeçare, siç konfirmuan familjarët. Ceremonia e varrimit u zhvillua në mënyrë private, në rreth të ngushtë familjar, sipas amanetit të të ndjerit.
Ndryshe, Rexhep Qosja shërbeu si drejtor i Institutit Albanologjik prej vitit 1972 deri më 1981. Mbledhja vjen në nderim të veprës së tij letrare dhe shkencore.