Ish-ministrja spanjolle e Punës dhe Sigurimeve Shoqërore Fatima Bañez ishte mes viktimave të aksidentit hekurudhor mes dy trenave në provincën e Toledos, të mërkurën në mëngjes. Ajo ndodhej në trenin Iryo që u përfshi në aksident. Vdekja e saj u konfirmua nga një zëdhënës i Partisë Popullore, ndërsa bilanci i viktimave të aksidentit arriti në 69, sipas burimeve.
Në orët para konfirmimit, fati i Bañez ishte i panjohur, pasi nuk ishte arritur të kontaktohej me të. Burimet e përshkruajnë atë si mikeshë të ngushtë të Ursula von der Leyen.
Bañez drejtoi Ministrinë e Punës dhe Sigurimeve Shoqërore në qeverinë e Mariano Rajoy, gjatë një periudhe të vështirë ekonomike për Spanjën. Ajo u emërua në këtë detyrë në dhjetor të vitit 2011, kur Rajoy mori detyrën si kryeministër, dhe qëndroi deri në qershor të vitit 2018.
Karrierën politike e nisi në Partinë Popullore të Andaluzisë, ku mbajti disa detyra partiake. Në vitin 2000 u zgjodh për herë të parë deputete në rajonin e Huelvës, në zgjedhjet që i dhanë José María Aznar shumicën e tij të parë absolute parlamentare. Më pas, ajo u mor me çështjet buxhetore dhe koordinoi sektorin ekonomik të partisë.
Në qershor të vitit 2018, Rajoy u largua nga pushteti pas një mocioni mosbesimi, që çoi në zgjedhjen e Pedro Sánchez si kryeministër.