Agjencia Shtetërore e Kadastrës (ASHK) ka njoftuar fillimin e procesit të formalizimit të ndërtimeve informale të pozicionuara përgjatë gjurmës së hekurudhës Tiranë-Durrës. Ky proces synon trajtimin e rreth 500 objekteve të identifikuara në bashkëpunim me Hekurudhën Shqiptare, pas përcaktimit të saktë të vijës hekurudhore.
Sipas njoftimit zyrtar, procesi përfshin verifikime të detajuara në terren nga Drejtoritë Vendore Tiranë Veri dhe Tirana Rurale 2. Procedura përfshin të gjitha objektet e ndërtuara pa leje ose në kundërshtim me lejet e ndërtimit që plotësojnë kushtet ligjore, pavarësisht nëse pronarët e tyre kanë kryer vetëdeklarim në periudha të mëparshme.
Institucioni bën të ditur se për objektet që nuk janë vetëdeklaruar më parë, por që përputhen me afatet ligjore, banorët do të kenë mundësi të plotësojnë formularin përkatës dhe të kryejnë pagesën e shërbimit gjatë verifikimit në terren. Ky veprim synon të mundësojë nisjen e menjëhershme të procedurave nga ana e ASHK-së.
Autoritetet u kanë bërë thirrje banorëve të këtyre zonave të bashkëpunojnë me specialistët e terrenit për të garantuar një proces të shpejtë dhe transparent. Zonat ku po përqendrohet puna e ekipeve janë:
• Njësia Administrative 9
• Njësia Administrative 11
• Mëzez
• Katundi i Ri
• Kashar