Kancelari austriak, Christian Stocker, zhvilloi një takim me kryeministrin në detyrë të Kosovës, Albin Kurti, në Vjenë. Në qendër të diskutimeve ishin zhvillimet politike në Kosovë dhe procesi i dialogut me Serbinë.
Përmes një postimi në rrjetin social “X”, Stocker vlerësoi Kosovën si një partner të rëndësishëm për Austrinë dhe Evropën, duke shprehur përkushtimin për mbështetjen e vazhdueshme të integrimit të vendit në Bashkimin Evropian. Kancelari austriak nënvizoi se ky është një moment thelbësor për të adresuar sfidat aktuale.
“Tani është koha për të kapërcyer bllokimin politik, për të çuar përpara reformat dhe për të bërë përparim të prekshëm në dialogun e lehtësuar nga BE-ja me Serbinë”, deklaroi Stocker. Ai shtoi se sigurimi i një të ardhmeje të qëndrueshme evropiane për të gjithë rajonin e Ballkanit Perëndimor mbetet objektiv i përbashkët i dy vendeve.