Nëntë persona, të identifikuar me inicialet F.M., F.M., M.M., S.K., N.B., D.M., A.M., N.M. dhe G.Q., kanë dalë para gjykatës pas arrestimit të tyre në operacionin e datës 1 korrik. Ky aksion u udhëhoq nga Prokuroria Speciale e Kosovës dhe Drejtoria për Hetimin e Krimeve të Rënda dhe Krimit të Organizuar në Policinë e Kosovës, me mbështetjen e Doganës së Kosovës dhe Administratës Tatimore të Kosovës.
Sipas hetimeve, grupi dyshohet se ka operuar përmes transaksioneve fiktive të derivateve të naftës, duke u përfshirë në këto vepra penale:
• Shpëlarje parash
• Kontrabandim mallrash në bashkëkryerje
• Pjesëmarrje ose organizim i grupit kriminal të organizuar
• Falsifikim të dokumenteve lidhur me tatimin
• Shmangie nga tatimi
Gjatë operacionit, autoritetet kanë sekuestruar prova të shumta, përfshirë 15 mijë euro cash, pesë vetura, pesë autobotë, dy armë zjarri dhe 54 fishekë. Gjithashtu, janë sekuestruar 301 euro në kartëmonedha prej 2 eurosh, të cilat dyshohet se janë të falsifikuara, krahas pajisjeve elektronike dhe dokumentacionit përkatës. Prokuroria Speciale ka kërkuar zyrtarisht caktimin e masës së paraburgimit për të gjithë të dyshuarit.