Kirurgu Baton Kelmendi nga Klinika e Kirurgjisë së Fëmijëve në Qendrën Klinike Universitare të Kosovës (QKUK) ka dalë me një sqarim publik për përleshjen e 26 janarit brenda ambienteve të spitalit.
Në një postim në Facebook, Kelmendi shprehet se ndjen obligim moral për të shprehur keqardhjen e tij të thellë lidhur me situatën e krijuar pas publikimit të videos së incidentit. Ai shpjegon se, ndërsa po fliste në telefon, u përball me një sulm të papritur. Incidenti ndodhi dy ditë pas një debate profesional në Kolegjiumin e Klinikës, që kishte për temë trajtimin dhe interesin më të mirë të pacientëve.
Kelmendi thekson se reagimi i tij ishte në vetëmbrojtje dhe se nuk ka sulmuar askënd, duke u përpjekur të shmangë përshkallëzimin e situatës. Ai shprehet i mërzitur që pamjet kanë shqetësuar pacientët, kolegët dhe opinionin publik.
Doktori nënvizon se profesionalizmi dhe respekti duhet të jenë gjithmonë parësorë për mjekët. Incidenti përfshiu dy kirurgë të klinikës.