Komiteti për Punë të Jashtme i Dhomës së Përfaqësuesve të Shteteve të Bashkuara miratoi më 13 maj projektligjin H.R. 8562, që parasheh emërtimin e një ndërtese të Ambasadës amerikane në Prishtinë si “Eliot L. Engel Building”. Ky emërtim nderon ish-kongresistin Eliot L. Engel, njohur si një nga mbështetësit më të fortë të Kosovës në Uashington. Miratimi u bë me 39 vota për dhe 7 kundër.
Projektligji, i sponsorizuar nga kongresisti demokrat Ritchie Torres, u paraqit më 28 prill së bashku me republikanët Michael McCaul dhe Brian Mast, si dhe demokratin Gregory Meeks. Këta të katër ligjvënës kanë pasuar Engel në krye të Komitetit për Punë të Jashtme të Dhomës së Përfaqësuesve. Kryesuesi aktual i komitetit është Brian Mast, republikan nga Florida.
Sipas tekstit të projektligjin, ndërtesa e Kancelarisë së Shteteve të Bashkuara në Prishtinë do të njihet zyrtarisht si “Eliot L. Engel Building”, ndërsa çdo referencë e mëvonshme në ligje, harta, rregullore apo dokumente të SHBA-së do ta përdorë këtë emërtim.
Engel vdiq më 10 prill në moshën 79-vjeçare. Në Kosovë, figura e tij u vlerësua lart, teksa Kuvendi u mblodh në një seancë të posaçme për të nderuar kontributin e tij.
Mast deklaroi se emërtimi është i përshtatshëm, duke thënë: “Si anëtar i Kongresit, ai luftoi fort në vitet ’90 për të mbështetur ndërhyrjen e SHBA-së dhe për të ndaluar mizoritë që po kryheshin ndaj shqiptarëve etnikë në Ballkan dhe më vonë punoi drejt njohjes së Kosovës nga **SHBA-ja”. Gjatë debatit, Gregory W. Meeks foli për trashëgiminë politike të Engel, i cili u largua nga Kongresi në janar 2021, pas më shumë se tre dekadash në detyrë.
Projektligji duhet të kalojë ende në Dhomën e Përfaqësuesve dhe Senatin amerikan për t’u bërë ligj.