Glauk Konjufca, ministër i Punëve të Jashtme dhe zëvendëskryeministër i parë i Kosovës, bëri homazhe në Nju Jork në nderim të ish-kongresistit amerikan Eliot Engel. Kjo ndodhi dje, kur ai shprehu ngushëllimet në emër të Republikës së Kosovës për familjen e tij.
Në një postim në Facebook, Konjufca shkroi se ky ishte momenti për të nderuar jetën dhe veprën e mikut të madh të shqiptarëve dhe Kosovës. Ai theksoi se Engel, për dekada me radhë, qëndroi me përkushtim të palëkundur duke mbrojtur të drejtën e popullit të Kosovës për çlirim, liri e pavarësi. "Lavdi jetës dhe veprës së mikut tonë të madh. Kontributi i tij është në themel të miqësisë sonë të përhershme me Shtetet e Bashkuara të Amerikës", përfundoi ai.
Konjufca-n e shoqëroi Blerim Reka, shef i Misionit në Konsullatën e Përgjithshme të Kosovës në Nju Jork.
Eliot Engel vdiq më 10 prill 2026, në moshën 79-vjeçare. Ai u varros sot në Nju Jork, siç njoftoi Eric Dinowitz, anëtar i Këshillit të Qytetit të Nju Jorkut, në një postim në platformën X. Dinowitz e cilësoi Engel-in si luftëtar për drejtësi, i cili ndihmoi në ndalimin e spastrimit etnik në Kosovë, luftoi kundër punës së detyruar të fëmijëve dhe siguroi fonde federale për distriktin e tij.
Engel kishte qenë kryetar i Komitetit për Punët e Jashtme në Dhomën e Përfaqësuesve të SHBA-së dhe mori pjesë në seancën solemne të shpalljes së Pavarësisë së Kosovës më 17 shkurt 2008.