Kuvendi i Shqipërisë mbajti një minutë heshtjeje në fillim të seancës plenare për të nderuar ish-kongresmenin amerikan Eliot Engel, i cili ndërroi jetë pak ditë më parë në moshën 79-vjeçare.
Kryeparlamentari Niko Peleshi foli në nisje të seancës dhe e cilësoi Engel si mik të madh të shqiptarëve dhe mbështetës të palëkundur të aspiratave kombëtare. “Eliot Engel ishte një mik i madh i shqiptarëve dhe mbështetës i palëkundur i çështjes sonë kombëtare. Kontributi i tij në forcimin e marrëdhënieve shqiptaro-amerikane do të mbetet i paharruar. Në shenjë respekti dhe nderi për jetën dhe veprën e tij, ju ftoj të ngrihemi dhe të mbajmë një minutë heshtjeje”, tha Peleshi.
Engel përfaqësoi distriktin e New York-ut në Dhomën e Përfaqësuesve të Shteteve të Bashkuara nga viti 1989 deri në 2021. Ai u dallua si figurë e njohur e Partisë Demokratike në çështjet ndërkombëtare dhe si mbështetës i vendosur i çështjes shqiptare.
Gjatë viteve të luftës në Kosovë, Engel ishte ndër zërat më të fortë në Uashington për ndërhyrje kundër forcave serbe. Kontributi i tij la gjurmë të rëndësishme në marrëdhëniet shqiptaro-amerikane.