Fjalori i Madh i Gjuhës Shqipe, me 125 mijë njësive leksikografike në platformën fjalori.online, ka nxitur debate në opinionin publik pas publikimit të tij online.
Studiuesi i historisë politike Afrim Krasniqi kritikoi përkufizimin fillestar të fjalës parti, e përcaktuar si organizatë politike e një klase a shtrese shoqërore që lufton për të mbrojtur interesat e saj, në kundërshtim me shpjegimin juridik. Ai e cilësoi këtë si shpjegim të vjetruar, të lidhur me një sistem tjetër politik. Pas reagimit të tij në rrjetet sociale, përkufizimi u ndryshua në organizatë njerëzish me bindje të caktuara politike që garon në zgjedhje për të fituar vende në qeverinë lokale ose kombëtare.
Krasniqi vuri në dukje edhe përkufizimin e fjalës profesor, ku thuhej se ata janë ata që kanë përgatitur ose botuar vepra shkencore origjinale të një cilësie të lartë ideologjike e shkencore. Ai e quajti këtë absurd, duke theksuar se "cilësia ideologjike" rikthehet si standard 35 vjet pas rënies së sistemit totalitar. Pas kritikave, edhe ky shpjegim u ndryshua në fjalorin online.
Hartuesi i fjalës parti, profesor Valter Memisha, deklaroi se ekipi i gjuhëtarëve mirëpret sugjerime për përmirësim. "Profesor Afrim Krasniqi kishte një propozim të bukur, për arsye se ishte thjesht nocioni juridik i fjalës ‘parti’. Unë e kam parë në një kënd tjetër, ofrimi i atij përkufizimi është tepër me vlerë dhe ne mirëpresim sugjerime të tilla", tha Akademik Prof. Dr. Valter Memisha.
Në një postim të mëvonshëm, Krasniqi e quajti ndryshimin lajm të mirë dhe falënderoi autorët, por theksoi nevojën për konsultim paraprak me ekspertë të politikës, juristë e historianë. Ai sugjeroi rishikim të termave politikë, institucionalë e juridikë për të hequr shprehje të mentaliteteve të vjetra dhe për ta çliruar gjuhën shqipe nga indoktrinimi.