Kosova ka paraqitur zyrtarisht kërkesën për lirimin e mjeteve financiare në kuadër të Instrumentit për Reforma dhe Rritje të Bashkimit Evropian. Sipas Koordinatorit Kombëtar, Jeton Zulfaj, kërkesa përfshin të gjitha reformat e realizuara që ishin planifikuar të përmbylleshin deri më 30 qershor.
Bashkimi Evropian do të ketë një afat prej tre muajsh për të shqyrtuar dëshmitë dhe dokumentacionin e dorëzuar, përpara se të marrë vendimin për zhbllokimin e fondeve. Ky proces shënon hapin e parë për disbursimin e mjeteve, pasi fondet e parafinancimit ishin lëvruar gjatë vitit 2024.
Pengesat në Kuvend
Në raportin e dorëzuar nuk janë përfshirë gjashtë masa reformuese të parapara, të cilat nuk u përmbyllën brenda afatit kohor për shkak të bllokadës në Kuvend. Sipas Zulfajt:
- Pesë prej këtyre masave kërkonin miratim ligjor nga ana e deputetëve.
- Një masë nuk mundi të miratohej nga Qeveria në detyrë.
Kryenegociatori vlerësoi se mosfunksionimi i Kuvendit ka ngadalësuar dinamikën e reformave dhe ka rrezikuar fondet që synojnë zhvillimin dhe integrimin e vendit. Ai theksoi se hapat e mbetur do të procedohen për miratim sapo të konstituohet legjislatura e XI-të e Kuvendit. Sipas tij, nëse nuk do të kishte bllokadë, Kosova do të printe në rajon për përmbushjen e reformave.
Sipas planifikimit të institucioneve, kërkesa e radhës për lirimin e fondeve pritet të dorëzohet më 15 janar 2027, ndërsa autoritetet duhet të përmbushin dhjetëra hapa të tjerë reformues deri në fund të këtij viti.