Kredia e re për biznesin në Shqipëri u rrit gjatë vitit 2025 me 10%, duke arritur vlerën 296 miliardë lekë, sipas të dhënave të Bankës së Shqipërisë. Kjo shënon një ngadalësim krahasuar me rritjen rekord prej 24% të vitit 2024.
Tregtia, sektori dominues
Tregtia mbetet sektori dominues në strukturën e kredisë, me një peshë prej pothuajse 37% të totalit të kredisë së re të dhënë gjatë vitit. Kjo përfaqëson një rritje nga 35.6% e vitit paraardhës. Në vlerë, kredia për tregtinë arriti 109.2 miliardë lekë, me një rritje prej 14.2%. Ky zhvillim lidhet me shtimin e numrit të turistëve të huaj, që ka kompensuar pjesërisht dobësinë e kërkesës së brendshme dhe ka forcuar shërbimet e lidhura me turizmin.
Rënie në ndërtim
Sektori i dytë më i kredituar ishte ndërtimi, me 40.8 miliardë lekë kredi të re, por me një rënie prej 13% krahasuar me vitin 2023. Pesha specifike e këtij sektori u ul në 13.8%, nga 17.5% e vitit të mëparshëm. Kjo rënie mund të sinjalizojë arritjen e pikut të ciklit të rritjes pas pandemisë dhe ndikohet nga ndryshimet në financimet e projekteve të mëdha, kryesisht partneritetet publiko-private në infrastrukturën rrugore.
Rritje në industrinë përpunuese
Industria përpunuese renditet e treta, me 35.6 miliardë lekë kredi të re, në rritje me 29% krahasuar me vitin e kaluar. Pesha e saj u rrit në 12.1%, nga 10.3% e vitit paraardhës.