Autoriteti i Aviacionit Civil (AAC) njoftoi vendosjen e një kufizimi të përkohshëm për fluturimet me mjete ajrore pa pilot (dronë) në zonën e Pallatit të Kongreseve. Ky vendim është marrë në bashkëpunim me Albcontrol dhe me kërkesë të autoriteteve të sigurisë, në kuadër të aktiviteteve për festimin e Ditës së Pavarësisë së Shteteve të Bashkuara të Amerikës.
Sipas njoftimit zyrtar, ndalimi do të zbatohet më 17 qershor 2026, në intervalin kohor nga ora 18:00 deri në 21:00. Kufizimi përfshin një perimetër prej 150 metrash nga qendra e Pallatit të Kongreseve dhe një lartësi deri në 120 metra mbi nivelin e detit. Ky urdhër do të bëhet i ditur edhe përmes NOTAM-it përkatës.
Në ditët e fundit, kjo hapësirë është përdorur shpesh nga dronët për të filmuar protestat qytetare kundër investimeve në zonën e Zvërnecit. Megjithatë, autoritetet theksojnë se masa aktuale synon ekskluzivisht garantimin e sigurisë gjatë zhvillimit të aktivitetit festiv të planifikuar.