Irani është vënë në qendër të kritikave ndërkombëtare pas raportimeve se ka vendosur një tarifë deri në 2 milionë dollarë (rreth 1.7 milionë euro) për çdo anije që kalon në Ngushticën e Hormuzit. Ky korridor strategjik, i vendosur midis Iranit dhe Omanit, është një nga rrugët më të rëndësishme për transportin global të naftës dhe gazit.
Autoritetet iraniane i justifikojnë këto pagesa si dëmshpërblime lufte për dëmet e pësuara gjatë sulmeve amerikano-izraelite, si dhe pagesë për shërbime navigimi, siguri dhe mbrojtje mjedisore. Për më tepër, Teherani ka njoftuar përgatitjen e një protokolli të përbashkët me Omanin, i cili do të kërkonte marrjen e një lejeje paraprake për kalimin e anijeve.
Në lidhje me bazën ligjore, ekspertët detarë theksojnë se, ndryshe nga kanalet artificiale si ai i Suezit apo i Panamasë, ngushticat natyrore mbrohen nga UNCLOS. Kjo konventë detyron shtetet bregdetare të garantojnë lirinë e kalimit tranzit pa ndërhyrje.
Ndërkohë që disa kompani të vogla transporti raportohet se kanë paguar në heshtje, instituti kërkimor ISW e ka përkufizuar këtë veprim si një "rregjim zhvatjeje" detare. Agjencia Reuters ka konfirmuar se Shtetet e Bashkuara dhe Kina kanë bashkuar qëndrimet e tyre kundër këtij taksimi, ndërsa vendet e Gjirit kanë refuzuar gjithashtu politikën e re të Teheranit.