Kuvendi Kombëtar i Partisë Demokratike zhvilloi punimet ditën e sotme, ku delegatët miratuan ndryshimet e propozuara në statutin e partisë. Ndryshimet u prezantuan nga kreu i grupit parlamentar, Gazment Bardhi, pas fjalës së kryetarit Sali Berisha.
Ndër risitë kryesore të miratuara janë:
• Fuqizimi i rolit të grave dhe vajzave në strukturat drejtuese dhe listat e kandidatëve, duke rritur përfaqësimin nga 30% në 40%.
• Sigurimi i një përfaqësimi prej 15% për Diasporën shqiptare në organet e partisë dhe listat zgjedhore.
• Krijimi i një Komisioni të Seleksionimit të Kandidaturave për deputet dhe kryetar bashkie, si strukturë autonome përpara procesit të Primareve.
• Përmirësimi i organizimit në nivelin bazë dhe forcimi i Kolegjit të Kryetarëve të Grupseksioneve.
• Forcimi i raporteve mes degëve të partisë dhe të zgjedhurve vendorë, duke u dhënë këshilltarëve bashkiakë status të barabartë në raportet me drejtimin qendror.
• Njohja e statusit të barabartë për organizatat partnere, duke respektuar historikun e themelimit të PDSH.
• Mbrojtja e të dhënave personale të anëtarëve dhe saktësimi i procedurave për shkarkimin e kryetarëve të degëve.
Sipas vendimit të Kuvendit, neni i njohur si "neni Basha", i cili parashikon dorëheqjen e kryetarit të partisë në rast humbjeje në zgjedhje, mbetet i pandryshuar. Gjithashtu, procesi i Primareve vijon të mbetet pjesë e funksionimit të partisë.
Përditësime
Anëtarësia e Partisë Demokratike rikonfirmoi Sali Berishën në krye të forcës politike, në mungesë të kandidatëve rivalë. Punimet e Kuvendit Kombëtar, të cilat nisën në orën 11:33 nën drejtimin e Erisa Bajazitit, u fokusuan te miratimi i tetë ndryshimeve statutore. Gjatë ditës, delegatët do të votojnë për përbërjen e re të Këshillit Kombëtar.
Partia Demokratike ka përfunduar procesin e numërimit për Këshillin Kombëtar, duke zgjedhur 200 anëtarët e rinj të organit më të lartë vendimmarrës. Ky këshill do të ketë rol vendimtar në dy procese kryesore: përzgjedhjen e Kryesisë së partisë dhe hartimin e strategjisë për zgjedhjet e përgjithshme të vitit 2027.