Emisioni investigativ italian Le Iene ka publikuar një raport mbi një grup kriminal që operonte një call center në kullën luksoze 4Ever Green Tower të Tiranës, duke mashtruar shtetas nga vende europiane si Italia, Franca, Gjermania dhe Spanja.
Grupi, i goditur nga SPAK dy ditë më parë, kishte rreth 100 operatorë dhe konsulentë financiarë. Sipas investigimit të gazetarit Luigi Pelazza, operatorët telefonojnë klientët duke i nxitur të investojnë në platforma financiare të manipuluara, me shuma nga 250 euro deri në 200 mijë euro.
Mekanizmi i mashtrimit
Raporti u mundësua falë infiltrimit të një personi me përvojë trevjeçare në Qipro, i cili dokumentoi funksionimin e rrjetit. Këshillohej që klientët të mos fitonin më shumë se 30-50 euro në ditë, për t'i nxitur të investonin më tej. Një italian i punësuar aty deklaroi se fitonte 3500 deri në 10 000 euro në muaj nga kjo veprimtari.
Struktura ishte e ndarë sipas shteteve target, me operatorë që përdornin identitete të rreme dhe strategji të përshtatura. Punonjësit dorëzonin telefonat celularë në hyrje, ku u bllokoheshin kamerat për të parandaluar filmimet ose fotografitë.
Shifra dhe dyshime
Call center-i dyshohet se gjeneronte 25-30 milionë euro në muaj. Ngrihen dyshime se paratë përdoren për pastrim nga trafiku i drogës dhe i armëve, duke e kthyer Tiranën në bazë operative kyçe për mashtrime financiare ndërkombëtare.