Lufta në Iran ka rritur ndjeshëm çmimin e kerozinës, duke e dyfishuar mesatarisht që nga fundi i shkurtit, sipas Asociacionit Ndërkombëtar të Transportit Ajror (IATA). Kjo situatë po ndikon drejtpërdrejt në industrinë ajrore globale, duke parashikuar bileta më të shtrenjta dhe reduktim të fluturimeve gjatë muajve të verës.
Eksperti i aviacionit Cord Schellenberg shpjegoi se kerozina prodhohet në sasi të kufizuara dhe tregu i saj është i ndjeshëm ndaj luhatjeve të çmimeve. Rritja e kostove pritet të reflektohet në çmimet e biletave. Për më tepër, linjat ajrore mund të anulojnë fluturime joekonomike.
Kjo prirje ka filluar tashmë. United Airlines ka njoftuar shkurtrimin e 5% të kapacitetit të planifikuar për këtë vit, ndërsa Vietnam Airlines do të zvogëlojë numrin e fluturimeve për mungesë kerozinës.
Ndikimi në Evropë
Evropa është një nga rajonet më të ekspozuara, pasi 25-30% e kërkesës për kerozinë varet nga furnizimet e Gjirit Persik. Drejtori ekzekutiv i Ryanair, Michael O’Leary, paralajmëroi se, nëse konflikti vazhdon deri në maj, 10-20% e furnizimit veror mund të rrezikohet, duke detyruar anulime ose reduktime kapacitetesh. Në fluturimet brenda Europës, çmimet janë rritur 10-15% mesatarisht, me shtrenjtim më të madh për destinacionet e largëta.
Mbyllja e Ngushticës së Hormuzit nga Irani ka përkeqësuar situatën, duke rritur çmimet e energjisë. Ekspertët sugjerojnë rezervime të hershme për verën, pasi çmimet pritet të vazhdojnë të rriten, ndonëse stabilizimi mund të sjellë ulje të mundshme në të ardhmen.