Mbrojtësi 27-vjeçar Lumbardh Dellova është zyrtarisht futbollist i Amedsporit, skuadër që do të garojë në elitën e futbollit turk për sezonin 2026-2027. Njoftimi është bërë nga vetë klubi turk, i cili ka aktivizuar klauzolën e lirimit prej 950 mijë eurosh për ta shkëputur atë nga CSKA Sofia.
Dellova, i cili ka zhvilluar 69 ndeshje me klubin bullgar gjatë dy viteve të fundit, ka nënshkruar një marrëveshje trevjeçare. Klubi e ka vlerësuar lojtarin për shkathtësinë e tij, duke e përmendur si një element që mund të mbulojë pozicionet e mbrojtësit qendror, të djathtë dhe të majtë.
Ky transferim forcon koloninë shqiptare te Amedspori, ku përveç trajnerit Besnik Hasi, pjesë e ekipit janë edhe futbollistët Ermal Krasniqi dhe Florent Hasani. Gjatë karrierës së tij, para aventurës në Bullgari, Dellova ka luajtur për Ballkanin, Prishtinën, Hajdukun e Splitit dhe Lirinë. Për Kombëtaren e Kosovës, ai numëron 23 paraqitje dhe tri gola të shënuar.